१२१. मला सांगना

 तू हळूच येना

 मला साद देना

 तुला वाटते जे

 सांगून बघ ना

निःशब्द  ओळी     

स्वप्ने ही खुळी 

बोलावती

अन सांगती

कुठला बहाणा

मनात दाटल्या किती 

अबोल भावना रित्या

जपून ठेवल्यात मी

ऐकून बघ ना

तुझ्यात शोधते रे

हरवलेल्या मला

तिथे भेटशील का 

मला सांगना ?? 

- जुई

चालताना

चालताना चालताना एकदा पण सावरावे 

वाट चुकली चालताना तर कशाला घाबरावे 

रात्र येते सायंकाळी चांदणे सोबत असावे

दिसत नाही पुढे तेव्हा तेथे स्वतःला थांबवावे

शब्द द्यावे शब्द घ्यावे मनामध्ये घोळवावे

पंख त्यांचे पाहताना मी ही ते आकाश व्हावे

 - जुई

पाऊस पाणी ऊन सावली

 

पाऊस पाणी ऊन सावली

जिथे राबली माय माऊली

अशा माझ्या शिवारावर

एक दिवा तू लावून ये

जिथे पोरकी झाली माया

फुल सुगंधी गेले वाया

अशा उमलत्या एक कळीवर

एक दिवा तू लावून ये

एक कोपरा या हृदयीचा

माग काढतो त्या हृदयाचा

त्या माझ्या हृदयात सख्या
एक दिवा तू लावून ये

- ©®जुई

११९. मैत्रीच्या वाटेवर जाता

 

मैत्रीच्या वाटेवर जाता

असंख्य दिसती चेहरे

कुणी कोणाला माहीत नसते

तरी होतात सोयरे

मित्रा, या वाटेवर बघ

अडवळणाच्या वाटा

वाढत जाईल तुझ्या जवळचा

आठवणींचा साठा

जग हे सारे बदलत गेले

तरी ठेव मैत्र स्वतःशी

हरवत नाही वाट तुझी मग

सापडते तुझ्याच पाशी

- जुई ✍️

११८. सवाल जवाब

सवाल : 

ऐका ...

अवघड वाटे पूर्वी 

अन सोपे ही वाटावे

कुतूहल भारी  आधी 

नंतर अनुभव येती ग

वेगवेगळे स्वभाव आणि                      वेगळे वेगळे घरटे ग

वेगवेगळी नवीन नाती                          उंबर्यात बोलवती ग...

स्वप्न पडावी दिवस राती

सांग बंधन कुठले  ग 

जी जी जी जी

माझे बई तू ग माझे सखये तू ग हे हे हे हे हे हा...

जवाब : 

ऐका 

उत्तर असले सोपे तरी 

समजून घ्यावे पदोपदी

सुख दुःखाच्या संसाराची

चालावी सोबत सप्तपदी

नाती असली नवी तरी 

निभवावी ती प्रेमाने

उत्तर याचे शोधण्या ग

लग्नबंधनात ही तू येणे

जी जी जी जी

माझे बई तू ग माझे सखये तू ग हे हे हे हे हे हा...

- जुईली अतितकर

धुंद आज तू ही व्हावे

धुंद आज तू ही व्हावे, धुंद आज मी व्हावे

मिलनी तुझ्या नी माझ्या, नभी चांदणे फुलावे...||

रात ही पौर्णिमेची, आपल्या साथीची

फुले आठवांची, आपल्याच प्रीतीची...

कधी तू, कधी मी एकमेकांत गुंतून जावे...

मिलनी तुझ्या नी माझ्या, नभी चांदणे फुलावे...||

गोड गुपित तुझ्या मनीचे, अल्लड तुझ्या हसण्याचे

कळले आहे मज आता अर्थ सारे गाण्याचे

साथीला आज मी, तू ही मग एकसुर व्हावे ....

मिलनी तुझ्या नी माझ्या, नभी चांदणे फुलावे...||

चंद्र हि लाजला आकाशी आपल्या मिलनाला

आज सखे तुझ्यातला चंद्र मी पाहिला

शिंपडावे आज चांदणे, आतुर मन त्यात झुलावे...

मिलनी तुझ्या नी माझ्या, नभी चांदणे फुलावे...||

- जुईली अतितकर

सख्या सांगना

सख्या सांगना, माझा काय गुन्हा 

वेगळा हा भाव, मला का कळेना..||धृ||

रस्ता आपला,आज कसा चुकला

काटा फुलांचा, मनाला कसा रुतला 

फुललेला संसार आपला, झाला जुना 

वेगळा हा भाव, मला का कळेना......||1||

रोजचा तो तुझाच रे, रुसण्याचा बहाणा

आज रुसले मी एकदा, मलाही पहाना

हट्टाला पेटलासी हा, खेळ झाला जुना 

वेगळा हा भाव, मला का कळेना......||2||

मनीच्या स्वप्नांना परस्परांचा होता सहारा

विसरलास तू मला, वाढवूनी हा पसारा

स्वप्नात एकदा आता भेटशील का पुन्हा 

वेगळा हा भाव, मला का कळेना....||3||

- जुईली अतितकर

शेतातून दिनरात

शेतातुनी दिनरात माझा धनी राबतो

घामाने पिकवून मोती जगाला पोसतो

कोरलेल्या भाळी त्याच्या कष्टच भारी

जिंदगी उसनी झाली मागून रोज उधारी

आटला ग थेंब डोळा जगासाठी हसतो...||

माखलेला हात त्याचा मातीच्या चिखलाने

पावसाला शोधत शोधत शिवारी जाणे

मळक्या हातात त्याच्या देव मला दिसतो ||

पावसाचा कहर झाला लांबले मग येणे

नुसतीच हुरहूर लावून विसरून जाणे

मोकळ्या रानात तेव्हा मूग गिळून बसतो ||

- जुईली अतितकर

११७. अंगाई

आज वारा ही वाहतो अवकाशी बघ संथ 

गाईन अंगाई बाळा तू झोप ना रे शांत 

कसला हा हट्ट तुझा मजला आज का कळेना

हरवलेले हास्य तुझे मजला का मिळेना 

मनी काय ठेऊन बसलासी तू सांग  खंत....

परी कथेतून फिरवते बघ आज मी तुला

बोट घट्ट पकडून ठेव सोडू नको मला

नव्या वाटा नव्या दिशा पाहू नवा प्रांत...

नेहमी का रडणे तुझे ऐकून मी बावरते

झोप तुला नसली की मन माझे का घाबरते

तुला का वाटत नाही निजावे मी ही शांत

गाणे ही जमत नव्हते शिकली ना रे बाळा

तूच मग का घेतोस सारखी माझी रे शाळा

एकदा माझं म्हणणं ऐक नको पाहुस अंत

बघ वर आकाशात चंद्र चांदण्या ही आल्या

वेली वरच्या जाई, जुईच्या कळ्या ही निजल्या

तरीही का मिटले नाही डोळे तुझे निवांत

- जुईली अतितकर

११६.भूपाळी

उठ मुकुंदा जाग रे जाग रे 

उठ मुकुंदा जाग रे जाग रे 

प्रभात झाली, किरणे ल्याली

पसरले चहूकडे तेज हे

उठ मुकुंदा जाग रे जाग रे 

जळी नदीवर भरते पाणी

घागर घेऊन या गौळणी

तव लोण्याचे घडेच आता 

प्रेमाने माग रे माग रे

उठ मुकुंदा जाग रे जाग रे

निजली होती सारी दुनिया

तुझ्या दर्शनी उठली माया 

तव करुणेने फुलले जगती 

भक्तीचेच भाव रे भाव रे

उठ मुकुंदा जाग रे जाग रे

- जुईली अतितकर

११५. ओव्या

मोकळ्या रानात 

पेरलं रे मी सोनं

हिरवं माझं हे धन 

मातीतुन ||

राबतो रे दिन रात

मळलेल्या मातीत

दान दळलं जात्यात 

मूठभर ||

पावसाचा कहर 

फुलला नाही बहर

जगणं झालं जहर 

रित्या पोटी ||

घास मजला मिळतो

त्याच्याच कष्टाचा

सूर्य जरी अस्ताचा 

त्याच्या माथी ||

आलं हिरवं अंकुर

जगणं झालं सुखकर

भरलं माझं घरदार 

धन धान्यानी ||

ओवी

पहिली माझी ओवी ग 

महादेवाच्या पिंडीला

बेल पत्र वाहिला

चरणाशी ||

दुसरी माझी ओवी ग

गणरायाच्या मूर्तीला

मोदकाचा घास भरवला

नेवैद्यात ||

तिसरी माझी ओवी ग 

पंढरीच्या विठूला

रुक्मिणी जोडीला

शोभतसे ||

चौथी माझी ओवी ग 

करविराच्या लक्ष्मीला

धनधान्याच्या राशी हो

सौख्याच्या ||

पाचवी माझी ओवी ग 

अयोध्येच्या रामाला

त्रास भोगून उज्ज्वल

केले सूर्य वंशाला ||

माझा पाऊस

पहा तो कसा आज आला ग आई

भिजूनी मला तो सुगावा ग देई 

कसा मी न जाणे तयाला पहावे

कसा त्याच पाण्यात झोकाच घ्यावे

जरासे मनालाच  सांगून जाई

भिजूनी मला तो सुगावा ग देई 

सरीच्याच खेळात खेळेच वाटे

दुरावा सरीचा कसा हा पहाटे

नको हे बहाणे, नकोती ग घाई

भिजूनी मला तो सुगावा ग देई 

ग आई ढगांची असे हीच नीती

असेही मला ना कशाचीच भीती 

मला ही ढगांनी खुणावे तुलाही

भिजूनी मला तो सुगावा ग देई 

- जुईली अतितकर

साद

काय सांगू आज आता भेटण्या रे साद घाली

याच वेळी आपली ही ज्या ठिकाणी भेट झाली || धृ ||

नेहमीची वाट पाहे धीर आता राहवेना

रोजचा तो एक वादा आज तोची ना बहाणा 

ये असाही आस वेडी ही नव्याने लागलेली ||१ ||

येत आहे मी, तुला भेटावयाला त्या ठिकाणी

थांब थोडे आज राणी बांधलेले आसवांनी

मी तिथे आहे ग होती ज्या ठिकाणी भेटलेली  ||२||

- जुईली अतितकर

तुजवीण मज नाही रे पूर्तता

तुजवीण मजला आता नाही पूर्तता

येशील कधी घरी माझ्या रे भगवंता ||

सुख लाभले कणभर मज जे होते

घागरीत सारे दुःखची भरले होते

यावे तू असे दुःख हे सरता सरता ||

कसली रे चिंता मज नसते आता

दिवा ठेविला रे मनी मिणमिणता

तव प्रकाश मजला दे जाता जाता ||

इच्छा ही माझी राहिली उराशी

जग सारे जिंकले तरीही उपाशी

नाही ही असूया नसे कमतरता ||

- जुईली अतितकर 

११४. बावरे

आले आज भरून आभाळ

अशी आजची संध्याकाळ

नाही सरावी कधीही

जशी सोनेरी माळ

विणता विणता 

हे मायाजाल

गुंतले हे 

बावरे 

मन 

रे

- जुईली अतितकर

११३. गोंधळ

गोंधळ

ये गोंधळाला आई गोंधळाला ये

बोलावते जी आंबे गोंधळाला ये

दिवटी मशाल आई उभी सामोरी

त्रिशूळ घेऊन जग हे माझे उद्धारी

माळ कवड्याची घालून गोंधळाला ये

बोलावते जी आंबे गोंधळाला ये

भाळी मळवट भरून पाठीशी माता

चुकलो मुकलो माफी करिसी भक्ता

शाल शक्तीची घालून गोंधळाला ये

बोलावते जी आंबे गोंधळाला ये

उदे ग अंबा बाई...आई 

उदे ग अंबा बाई ...आई

- जुईली अतितकर

११२. ढग रुपेरी ते

ढग रुपेरी ते, खुणावती नभाला

सुख घेऊन रे,  चाफा हा बघ आला ||धृ ||

आले मज स्वप्नी, एक गाव उनाड

वळणावर दिसला वट वृक्ष पल्याड

थांबले किंचित सावली आडोशाला ||1||

उतरू नभ खाली, रिमझिमत्या सरी

उंचावर नेई,  पंखांची भरारी

आकाश ही ठेंगणे वाटते रे मजला ||2||

- जुईली अतितकर

१११. पोवाडा

सूर्य उगवला रायगडी

स्वराज्याची बसली घडी

राजा शिवबासाठी पायघडी

रयतेस लागली गोडी 

जी जी रे जी जी रे

 ( तो एक ऐतिहासिक दिवस कोरला गेला होता हर एक मावळ्यांच्या शौर्याचा, विजयाचा, आपल्या स्वराज्याचा तो दिवस होता ६ जून १६७४ या दिवशी पहाटे उठून, मंत्रोच्चार आणि संस्काराबरोबर आंघोळ करून, कुलदेवतेला स्मरून, राज्याभिषेक सुरू झाला. )

छत्रपती राजा माझा झाला ..

ओ हो ओ हो 

छत्रपती राजा माझा झाला .

नेमले त्याने अष्टप्रधानाला 

सोयरा बाईने ओवाळले राजाला

सोन्या, चांदीची झाली तुला 

जी जी जी जी 

(भव्य सिंहासन सोन्याच्या पत्र्याने मढवलेले होते.. शिवाजी महाराज सिंहासनावर आरुढ झाले. सोळा सवाष्णींनी त्यांना ओवाळले. ब्राह्मणांनी मोठ्या स्वरात मंत्रांचे उच्चारण केले. प्रजेनी महाराजानाआशीर्वाद दिला. ’शिवराज की जय’ शिवराज की जय’ च्या घोषणा दिल्या गेल्या. )

आई भवानीला पुजले आधी

कौतुके पाहे बाल संभाजी

जिजाऊंच्या आशीर्वादाची

साथ मिळाली राजाला जी 

जी जी जी जी

एक गर्जना झाली मोठी 

जयघोष राजाचा ओठी

रक्त वाहिले स्वराज्यासाठी

बलिदानाने भरली माती 

जी जी रे जी जी रे 

एक जयघोष सर्वदूर पसरला 

"जय शिवाजी...जय भवानी " 

- ©®जुईली अतितकर

११०. सावित्रीचा पोवाडा

 सावित्रीने गिरवले 

 बाया सारे शिकवले

 जोतिबाच्या कष्टाचे

 जग नवे घडवले 

 जी जी जी जी

श्रीगणेशा त्यांनी केला 

स्त्री शक्तीचा झेंडा पुढे नेला

सावित्री बाई दिसते मला

प्रत्येक यशस्वी महिला 

जी जी रे जी जी रे 

धरली हाती पाटी

जगाने दाखवली काठी

पण सरले नाही पाठी

अशी जोतिबांची महती

बोला जोतिबाच्या नावाने चांगभलं !

सावित्रीबाईच्या नावाने चांगभलं !

- जुईली अतितकर

१०९. प्रिय आई...

प्रिय आई...

तू कशी आहेस ?

मायेची, प्रेमाची वाहती नदी आहेस ...

सतत सगळ्यांच्या आवडीचा विचार करणारी 

त्यांच्यात स्वतः ला पाहणारी भरलेली वही आहेस ...

तू कशी आहेस ? 

लहान मुलांमध्ये रमणारी, 

साखरे सारखी विरघळून जाणारी

तू गोड खीर आहेस...

माणसे जोडण्याची तुझी सवय

सगळ्यांना जग जाहीर आहे...

आपले दुःख विसरून आम्हा वर

घातलेली फुंकर जशी आहे

शिवण काम करता करता

सगळ्याना बांधून ठेवणारी दोरी आहेस. 

तू कशी आहेस ...

तर तू अशी आहेस ...