८०. सचिन तेंडुलकर

मैदान बोलावत होते

जायचेच होते पक्के इरादे 

हार - जीत चे शल्य सोबत 

हे पाऊल नव्हते तितके साधे 

आंदोलने मनाची पार करत 

विकेट घेतली हरण्याची

झेलला चेंडू जिंकून त्याने

सीमा पार केली यशाची

 " सचिन तेंडुलकर "

 - जुई 

कशाला

वाटले आता फुलावे

पान पानानां कशाला

वेगळे वाटून त्याचे

सोहळे आणि कशाला

नेहमीचा गारवा हा

सोबतीला राहणारा

वाढलेल्या या उन्हाला

रुक्ष होऊनी पाहणारा

सांगतो आता फुलाला

थांबना घाई कशाला

बोलवावे पावसाने

ओल ही आणि कशाला

येत आहे वाटणारे

भाव वेडे मग कशाला

भेट होते गाठ होते

थांबणे आणि कशाला

- जुईली अतितकर

७९. अनोळखी कादंबरी

ओळखीची एक वाट

अनोळखी एक गाव

ओळखीच्या पाटीवर

अनोळखी एक नाव

ओळखीच्या होडीतून 

अनोळखी तो प्रवास

ओळखीच्या गाठीभेटी

अनोळखी सहवास

ओळखीच्या पानावर

अनोळखी अष्टाक्षरी

ओळखीची चार पाने

अनोळखी कादंबरी 

- जुईली अतितकर