७५. फक्त एक कप चाय

काठोकाठ कपात तरंगणारी साय

आनंद म्हणजे काय ...

फक्त एक कप चाय...

दिवसाची सुरुवात, पावसाची बरसात

शेजारी भजी तळलेली अजून लागतं तरी काय

आनंद म्हणजे काय ...

फक्त एक कप चाय ...

थकलेली काया, जमलोच कधी बोलाया

फक्कड बेत असा कधी कुठे जमलाय 

आनंद म्हणजे काय ...

फक्त एक कप चाय...

वाफेवर चहाच्या, आठवणी जगायच्या

चेहऱ्यावर त्या आनंद तेव्हा मी पाहिलाय

आनंद म्हणजे काय ...

फक्त एक कप चाय ...

- जुई

७४. पाऊस वारा

त्या सरी बरसुनी आल्या

 येऊनि गेल्या माझ्या दारी

वाहून आणल्या छोट्या मोठ्या 

आनंदाच्या लहरी

कोपऱ्यात ठिबकत होत्या  

सरी वाकड्या त्यातही  थोड्या

पावसात तेव्हा सोडल्यात मी

 स्वप्नांच्याही होड्या

वेगळ्या कोणत्या ना दाखवल्या 

मी वाऱ्याला वाटा

वाहत वाहत तो माग काढूनि 

आलाच कसा चोरटा

सोबत झाली त्याची आता 

अंगणी सरीचा सडा

पाऊस सरींची ओढ लागली 

वारा म्हणे भाबडा

- जुई