९४. आठवणी

असतात इतक्या 

गडद आठवणी 

जितके रंग

फुलांचे गडद 

झुलणारे स्वप्न

पोपटी फिकटसे 

पाने ही तेव्हा

दिसतात गडद 

- जुई

९५. ओळ उरलेली

मी मलाच विसरुन जाते

तू रोज नवा कळताना

मी तुझ्यात मिसळुन जाते

अंतर इतके असताना

मी तुझीच होउन जाते

जणु कळीफुलाचे देठ

मी तुलाच समजुन जाते  

वाहत्या नदीचा काठ

मी तेव्हा सांगत होते

का मनास माझ्या काही

जे तुझ्यात लपले होते

समजले मला का नाही

मी तुझ्यात बाकी उरते

ओंजळ माझी भरलेली 

मी साधी कविता लिहिते

ती ओळ तुझी उरलेली

- ©®जुई