३५. असे नाही

विश्व आहे लहान माझे

रमवते त्यात क्षण काही

इतरांना त्यात जागा नाही

इतके मात्र सान नाही

शांत आहे डोह मनाचा

शब्दाची त्यात गर्दी नाही

वेचले तर ओंजळ भरेल

इतकीही मी अबोल नाही

वेळ बदलली बऱ्याचदा

काळ आजही सरला नाही

नशीब ही बदलत खरं

मनगटी जोर संपला नाही

तुला वाटेल सरळ जरी

वाट माझी साधी नाही

वळणाची ही सवय झाली

हरवण्याची मज भीती नाही

स्वप्न माझी असली मोठी

जगाची मला पर्वा नाही

नाते लोटून पुढे जाईन

असे मात्र होणार नाही

- जुईली अतितकर