१. नाते प्रेमाचे

कळले आहे मजला हे नाते प्रेमाचे,

शोधत गेले कुठवर गाव मी त्याचे

वस्ती छोटी माझी होती कौलाच्या घरांची,

वस्तीतूनच दिसले आहे क्षितिज दुरवरचे

वाट नागमोडी त्याला वळणे होती फार,

हमरस्त्याला लागले माझे पाय आशेचे

नाते विणले सुंदर जणू नक्षत्रांच्या माळा,

सोबत आपसूक आले तेव्हा धागे मायेचे

कळता कळता जुळल्या वाटा वळणावरच्या

आणि कुठवर शोधत गेले होते गाव प्रेमाचे

- जुईली अतितकर