५६. पाऊस

वेगळे काही आज सांगत नाही 

चातकासम वाट ही पाहत  नाही 

शिंपडणे आज तुझे असे अवेळी 

काळ्या मातीला ओलावत नाही 

झिरपणे तुझे टिपूस थेंबातूनी 

मोहरून फुलाला सुखावत नाही 

आला ना दूरच्या प्रवासातुनी  

तरी ग्रीष्म मनीचा सरत नाही 

तहान माझ्या कवितेची भागवण्या 

मन आताशा तेवढे झुरत नाही 

कधी ओंजळीत ये मोतीच बनुनी 

दवात मन माझे ही  रमत नाही 

येशील तू मग बरसूनी अंगणी  

थांबण्याचा हट्ट कुणी करत नाही  

- जुईली अतितकर