सोडून साथ आता येथून दूर जाणे
दाटून कंठ येतो साऱ्याच आठवाने ||
तुमच्याच संगतीने फुलले मळे स्वरांचे
आता खुणावती ते स्वर आर्त भैरवीचे
सरता वसंत येथे मी पाहिला नव्याने ||
येथे अनंत रूपे दिसली दया घनाची
पूजले तनामनाने सेवा सदैव त्याची
चुकले असेन कोठे विसरून सर्व जाणे ||
अपुरे अभंग नाते राहोत स्नेहबंध
सहवास संपताना यावा सुरेख गंध
संगे स्मृती फुलांनी उरला प्रवास पहाणे ||
आरास आसवांची डोळ्यात मांडलेली
सांजावता दिशांनी मज साद घातलेली
घेते निरोप आता भरल्या या मनाने ||
- जुईली अतितकर
No comments:
Post a Comment